【明報專訊】民建聯黃定光(象哥)過去幾年大力推銷邊境商業城，一直只聞樓梯響，噚日佢正式向傳媒公布最新進展，喺拉攏各方、同政府傾掂數，成功爭取將青山公路洲頭段惇裕路一帶，現時係停車場等嘅42萬呎地，改為購物城，佢話該處可以擺384個貨櫃做outlet，佢有意參考英國boxpark等著名outlet去設計，仲已諗好打算引入乜嘢類型商戶，期望趕及十．一黃金周前開幕。

象哥有意參考英outlet設計

噚日香港中華出入口商會一眾領導層同傳媒午宴，象哥喺飯局尾聲突然出現，仲向大家宣布呢個商業城。佢話搵咗6個地方都唔得，最終喺鄉議局幫助下，搵到落馬洲附近呢個地段，該處村民亦有興趣搞，佢未來會做義工幫商業城穿針引線「招商」，大計係商業城五成舖頭都賣香港品牌，三成引入運動或其他大型牌子，做到好似東薈城outlet咁喎，其餘兩成就做餐飲。

象哥話相信商業城會係多贏，商業城租金肯定比商場平，亦能減低自由行對北區、元朗、屯門嘅壓力，做到分流作用。佢話如果呢個商業城成功，亦會考慮喺其他邊境地區引入其他商業城。