父唐翔千出自傳 揭唐唐風雨下誕生

父唐翔千出自傳揭唐唐風雨下誕生

[2015.02.05] 發表

【明報專訊】有出版社幫前政務司長唐英年(唐唐)嘅爸爸唐翔千出自傳，呢本書除咗講述唐父嘅奮鬥歷程，仲有唔少章節提及同唐母尤淑圻嘅愛情史，仲有好多唐唐細路仔時嘅珍貴相片。書中仲爆料，話唐唐原來喺打風時趕住出世，搞到爸爸媽媽好狼狽，要狂風大雨下搵的士趕去醫院！

父母狼狽截的士去養和

唐翔千家族喺無錫經營毛紡織工業，唐翔千1950年海外學成後來港發展，並於1951年同尤淑圻共諧連理，翌年唐唐就出世。唐唐係家中大仔，《唐翔千傳》就透露，9月6號晚上唐母作動，當時風雨交加，唐父好辛苦先搵到部的士，送唐媽媽去養和醫院，唐唐平安出世，唐翔千先鬆一口氣，並即致電遠在上海嘅唐唐爺爺唐君遠報喜訊。

「英年」——智慧過人的英才

咁唐唐個名「英年」又有無典故嘅呢？書中披露，按家族名譜，唐翔千係「千」字輩，接住嚟係「年」字輩，而爺爺幫手改名「英年」，意思係希望長孫「是一個智慧過人的英才」。

書中都有提及1989年北京發生咗「六四風波」，當年身在澳洲嘅唐翔千見到好多外商從內地撤資，而唐翔千就話相信「實業救國」，反其道返內地投資。佢去東莞搞合資企業，成立東莞生益電子有限公司，由紡織生意改為開發電子生意，但生益頭幾年經營困難，首3年就虧損6000幾萬元，但捱過苦日子，第四年開始賺錢，其後曾創下一年賺到3億多元嘅佳績。