3匪鐵通硬闖天使家警鐘嚇退 暫住酒店

3匪鐵通硬闖天使家警鐘嚇退暫住酒店

[2015.02.03] 發表

在家千日好，有乜好得過踢完90分鐘比賽後，與老婆和乖女齊齊安坐家中享受天倫之樂？但「天使」迪馬利亞似乎不獲上天眷顧，在上周六英超為曼聯全取3分返回家中冇耐，便有3名匪徒破門行劫，雖然最終被警鐘嚇退，但天使一家飽食驚風散，今日在足總盃出戰劍橋聯，希望可以收拾心情啦。

近日曼徹斯特遇上寒流，白雪紛飛，跟迪馬利亞以往在西班牙及阿根廷的陽光普照相比，完全差天共地。不過天使似乎覺得好新鮮，愛車雖然被白雪覆蓋，但仍然開心留影，難怪路爾斯華倫西亞早幾日就話「迪馬利亞好似好享受新生活」。不過華倫西亞似乎烏鴉口，一班賊人立即出現，讓這名阿根廷翼鋒體現英倫另類文化。

保鑣貼身保護

在上周六曼聯在主場李斯特城，迪馬利亞踢足90分鐘，雖然冇入球助攻，但球隊輕勝3﹕1後，都總算可以開心返屋企；只不過返到位於柴郡的家中，還未坐定之際，就有3名匪徒手持鐵通打爛大門，正想闖入「做世界」，好彩天使的豪宅警鐘大響，嚇走3個大賊。不過迪馬利亞一家三口似乎仲驚，要由趕到現場嘅曼聯保安隊伍保護下離開，後來由警方護送前往酒店暫住，天使而家揸車外出甚至有保鑣貼身保護。

贊奴沙或正選鬥劍橋聯

迪馬利亞受驚，今日主場對劍橋聯嘅足總盃第4圈重賽應該唔使預佢，上仗英超重獲正選的贊奴沙可能再擔大旗。

領隊尹戈爾就勉勵呢個小將話﹕「佢有天分，但要在比賽及訓練時表現到先得，唔係我決定正選陣容，而係球員自己。當我覺得他準備好時，就會派佢上陣。」

更多體育一