【明報專訊】佔領行動完結個多月，前港區人大代表吳康民近日就推出新書《「佔中」是怎樣煉成的？》，收錄佢喺各大報章撰寫關於佔中嘅文章。康民叔兩年前接受訪問時，講過去到90歲就會唔再寫文，不過，佢喺新書序言就話，?家自己好似「停不了的音樂」，只要「仍有一口氣，仍要關心時政」，都會繼續寫文。

康民叔噚日喺中環舉行新書發布會，中聯辦副主任王志民同特首梁振英都有出席，可惜發布會係閉門嘅，記者朋友無機會同康民叔傾偈，請教佢對最新政治局勢嘅睇法。

電腦書寫已經係日常生活一部分，但康民叔喺序言就提到，自己即使學電腦，都唔會放棄用筆寫作，因為如果手指離開咗支筆，靈感都可能會無埋，講明用筆書寫係「此生可能改不掉」嘅習慣。