【明報專訊】社民連立法會議員梁國雄(長毛)等一共16人，涉嫌違反之前旺角佔領區嘅禁制令，但因為律政司打算告佢哋刑事藐視法庭，所以前日獲撤另一條「阻礙公職人員執勤」罪，其中有13人想攞番訟費。裁判官噚日頒令佢哋可以攞番，長毛話律師只係收佢「68.9元」處理文件費，裁判官雖然一度質疑佢有無單據，但最終都接納申請，批准佢攞番「68.9元」。至於點解係「68.9元」？梗係唔係亂噏，唔使Emily解釋，大家都心中有數嘅。

主任裁判官羅德泉話，控方「先落案、後撤回」嘅決定唔係因為證據有變，亦唔係被告嘅過失，只係控方喺唔同時間有唔同考慮結果；仲話警方落案時，一早知被告要去高院就藐視法庭罪應訊，但仍決定「雙軌」檢控，警方咁做當然有原因，法庭唔會追尋，但既然咁做，就要承擔訟費後果，「無理由要被告單獨承擔責任」。長毛原本話律政司長袁國強失職，想直接向佢攞「虛耗訟費」，裁判官就話呢個係官員問責問題，唔屬於「虛耗訟費」範圍，所以唔批。

長毛話，申請訟費唔係為咗錢，而係要攞番個公道，佢仲話之後可以補番張單。其餘人亦攞番200至500蚊訟費。