樹根嬲泛民被捕唔開會 批梁家傑 「你哋集體自殺 地球會唔轉？」

樹根嬲泛民被捕唔開會
批梁家傑「你哋集體自殺地球會唔轉？」

[2014.12.18] 發表

【明報專訊】佔領結束，但立法會內泛民、建制仍然係勢成水火，好似噚日工務小組開會，建制派不滿小組主席公民黨梁家傑上個禮拜去「佔鐘」被捕而取消會議。民建聯鍾樹根直指梁家傑嘅決定，係「驕橫跋扈」同「輸打贏要」，仲話﹕「你哋(泛民)今晚15個人集體自殺，呢個地球唔轉啊？冇可能咁㗎嘛你。」

話說15名泛民議員上周四於金鐘清場時被捕，其中13人係工務小組委員，包括主席梁家傑及副主席胡志偉，梁家傑上周五凌晨透過秘書處徵詢全體委員意見後，決定取消當日舉行嘅工務小組會議，但噚日開會時，建制派就翻呢個舊帳，有議員認為只要夠法定人數就應該開會，泛民議員被捕同會議並無關係。

范國威：建制飯局亦要求縮會

不過，新民主同盟范國威就反駁建制派根本係雙重標準，話建制派噚晚亦因私人活動，集體去跟財爺食晚飯，要求縮短立法會大會開會時間，又揶揄樹根「次次同主席駁火，四字詞語都未講得啱」，樹根隨即提出抗議，話有關言論係對佢嘅「悔(應是侮)辱」，要求范國威收回言論，強調自己「頭先講所有四字詞語都好正」。范國威認同樹根噚日嘅詞語用得正確，澄清自己所講嘅係之前會議時言論，係事實陳述，唔會收回咁話。睇番資料，鍾議員曾經將「明目張膽」講成「明張目膽」、將「子虛烏有」講錯為「子烏虛有」。