理大大樓被改名「C煙」
中學掛「我要真普選」直幡
[2014.10.31] 發表
【明報專訊】本港各大專院校教學樓嘅「冠名權」一向值錢，但理工大學兩座教學大樓，噚日竟然一夜間「被改名」，其中C座教學大樓變咗叫「李C煙」，冇幾遠嘅D座就變成「Democracy」。相片噚日凌晨喺網上瘋傳，引起網友熱論，有人大讚做法「有創意，我鍾意」；亦有人唱反調，認為爭取「真普選」唔應該搞學校建築物，况且貼字都要貼得有意義，現時效果恐怕適得其反。
Emily收到消息後噚日凌晨趕去理大了解，見到校內掛滿爭取真普選嘅宣傳單張同橫額，證實除咗C座同D座「被改名」，其他教學大樓未有變身。Emily見到有關字體大約離地4至5米，相信係預先剪裁再貼上，未有破壞牆壁結構。
理大保安昨將字移除
理工大學發言人話，學校保安員巡邏時，發現C同D座標誌隔籬畀人貼咗字，校方認為咁樣做唔恰當，噚日朝早8點半將字移除。目前冇發現其他大樓有類似情况。
自從上周四獅子山山頭出現「我要真普選」巨型直幡後，多間大專近日都有相同字眼嘅黃色banner，呢種風氣並蔓延到中學，噚日大角嘴中華基督教會銘基書院有學生喺走廊掛上成層樓咁高、寫住「我要真普選」嘅黃色直幡，據講好快已拆除，而銘基書院可能成為全港首間掛真普選直幡嘅中學。
更多港聞
【明報專訊】學民思潮召集人黃之鋒成為雨傘運動焦點人物，Emily噚日喺一個記者會上遇到之鋒爸爸黃偉明（Roger），佢同Emily講一直唔擔...
詳情
【明報專訊】捐血有得送自助餐優惠券！香港紅十字會輸血服務中心發言人噚日公布，踏入11月臨近感恩節，為咗向捐血者表示謝意，凡喺11月1日至30...
詳情
相關新聞
