【明報專訊】去年因為悼念南丫海難一周年，十一國慶並無放煙花；今年係中華人民共和國成立65周年，就恢復安排煙花匯演喇。今年第一幕「我是中國人」，歌曲高潮嘅部分會打出23個「中国人」金色字，眼利嘅讀者可能會留意到「中国人」嘅「国」用咗簡體字，消息公布之後即刻成為網民熱話。

65歲 響65發禮炮

不過大家唔使擔心太多嘅，事關煙花「国」字用簡體，之前都有試過，主辦單位解釋話因為「國」字繁體結構繁複同唔對稱，所以先用簡體字啫。主辦單位仲話今年係中華人民共和國65歲生日，最後一幕會響起「65發禮炮」，祝願香港繁榮安定，歡樂滿載咁話。

今年主辦國慶煙花匯演嘅香港友好協進會用咗600萬元籌備，表演晚上8點正舉行，分為9幕，歷時23分鐘30秒，將會由3艘躉船發放23,888枚煙花，想睇嘅市民記得當日早啲霸定位啦。