【明報專訊】暑假係展覽旺季，睇完書食完美食，聽日就開始喺會展舉行嘅電腦通訊節，展期到25號，票價30元。大會有入場優惠，購票市民會有一張必中擦擦卡，最少會擦中20元購物券，每日嘅頭500人可多一張擦擦卡，有一半機會擦中禮品。

參展商樂視重槌出擊，推出99元一部40吋電視。樂視之前喺網上2秒賣咗100部智能電視X50 Air，市場部主管鍾詠薇話，為咗延續上次嘅紀錄，決定第一次參展就推出首日優惠，以99元嘅價錢，賣50部原價3187元嘅S40 Air電視加一年電視節目。

另外，每日亦會有10部X50 Air拎出嚟場內拍賣，以及即場出售X50 Air、S40 Air，限每日每款30部。至於幾時可以唔使搶，鍾詠薇就話，要等貨源供應穩定先啦。