民主黨單張抗「袋住先」
卿姐見完張曉明遊埠

民主黨印製嘅宣傳單張，會同街坊解釋「什麼是真普選」、「為什麼撐佔中」同「什麼是假普選」等。（羅健熙提供）

【明報專訊】中聯辦主任張曉明同民主派政黨見面，民主黨排第一，聽日就會喺政府總部見面，外間分析中聯辦要「先易後難」，不過民主黨主席劉慧卿就唔同意呢個講法，仲叫大家唔好有幻想，原來卿姐下星期會離開香港，同中學同學去夏威夷玩，23號(下周六)先返港。

卿姐話，泛民各成員一早將大家幾時會離開香港嘅日期，交畀飯盒會召集人馮檢基，佢亦一早講明自己呢段時間唔喺香港，相信中聯辦方面都知道。不過卿姐強調唔介意自己無份會面，話就算佢唔喺度，民主黨都會有其他成員出席，對於第一個黨見定係最後見，佢都無所謂。卿姐話佢原本24號先返香港，但當日佔中舉辦「民主登高日」，所以佢亦提早一日出發同返港，以便出席呢個活動。

雖然暑假，但民主黨喺政改問題上就無停手，為咗抗衡政府宣傳「袋住先」嘅攻勢，該黨印咗超過70萬張政改單張，準備「入信箱」喺全港公屋派發。該黨副主席羅健熙話要同市民解釋無真正選擇嘅假普選係唔可以「袋住先」，就好似一班羊都可以選特首，但只可以喺獅子同狼之間揀，「最後都會被是但一隻食咗」。