【明報專訊】香港生活緊張，唔少人都喜歡出外旅行唞氣。旅遊平台Travelzoo最近向訂閱用戶進行調查，問呢一批愛旅遊嘅人，有咩嘢喺香港唔敢做、但去到外地都想試一試。結果，意想不到，原來近三成人話想喺街上唱歌跳舞，其次係唔使化妝出街！其實，呢啲嘢有勇氣就做到，反正尖東海濱日日都有人唱歌啦！

日台深度行成新寵

調查亦發現，呢班用戶中，九成話計劃未來半年外遊，其中一半會選擇5天以下嘅短線行程，首選目的地係台灣、日本及韓國。不過，受訪者對於台灣與日本呢啲旅遊熱點，已經唔再限於食、買、玩，反而會選擇較為冷門或者有啲深度嘅行程。

調查發現，台灣嘅深度行地點頭三位，分別係台南(37%)、阿里山(35%)及日月潭(30%)；日本方面頭三位係四國(45%)、 立山黑部(37%)及白川鄉(25%)。