【明報專訊】立法會主席曾鈺成雖然係民建聯，但喺建制派中算係開明嘅一人，佢最近喺清談節目自爆同朋友講過更加政治唔正確嘅言論，就係關於台獨同藏獨。

港台電視部製作全新英語清談節目《In Conversation》，聽晚7點喺無綫明珠台首播。港台向Emily預告，曾鈺成喺節目話，「有時候我會問朋友一些很政治不正確的問題，例如我會說﹕『看來中國應該讓台灣和西藏都獨立，這樣我們就不會那麼麻煩了……』」。嘩，如果呢番話喺內地講出嚟，分分鐘畀國保約訪談兼控告「煽動顛覆國家政權罪」都似。

訪談嘅主持人係Stephen Davies，當年曾經做過駐守新界嘅英國水兵，六七暴動時候命拘捕暴動分子，曾鈺成當年企喺工人一方，事隔47年，兩人聚頭時少不免話當年。

曾鈺成呢排煩緊立法會審議財政撥款嘅拉布。佢噚日話，𠵱家最唔理想嘅，係有啲議員雖然反對拉布，但又唔想承擔支持剪布嘅決定，佢覺得將剪布權交畀議員係合理做法，到時就算泛民議員投票反對剪布，都要向公眾負責。