【明報專訊】將軍澳香港單車館將於本周三(30日)正式開放畀預訂嘅市民使用，雖然唔係個個都可以入到「鑊形」賽場踩車，但都可以去場館外嘅公園玩吓。公園佔地5.3公頃，到處翠綠，除咗有露天劇場、緩跑徑、中央草坪、兒童遊樂場等例牌康樂設施，仲有畀人玩X-Game嘅極限運動場，以及運動攀登牆。

康文署話，呢個極限運動場內設有3個坡度不一、難度各異嘅碗形和半管道形場地，可供滑板及特技直排滑輪活動愛好者一展身手。唔鍾意刺激玩意，亦可以帶小朋友去公園放艇，公園內有一個水深40厘米嘅模型船池，供放玩各類模型船。香港單車館位於將軍澳寶康路105至107號，鄰近唐明苑。