【明報專訊】前財政司長梁錦松(阿松)噚日去教育學院同師生演講，講全球化衝擊，教年輕人應該點裝備自己。佢大談人生道理，仲好似傳道人上身咁，不忘談教義，一個半小時嘅演講中，不下三四次提醒後生仔要「行公義、好憐憫、存謙卑的心、與神同行」(《聖經》彌迦書章節)。阿松2003年因「偷步買車」事件黯然離任，佢話離開政府後，最大得着就係可以成為基督徒。

男人較短命因被女人激死

62歲嘅阿松一啲都唔老套，談及全球化對社會衝擊嘅講題，佢就表現得對科技發展瞭如指掌。佢話𠵱家科學發達，人類壽命愈來愈長，話唔定遲啲大家嘅壽命會去到150歲，但佢自己都話「150歲就真係長咗啲」。至於好多數據都顯示女人長命啲，阿松就話原因好簡單，搞爛gag話「因為男人被女人激死」。

盼見3D打印食物

講起女人，佢就話有時喺屋企肚餓時都會叫老婆伏明霞煮個麵，「但最後都係我自己煮」，所以佢一講到現時3D打印技術就好興奮，佢話相信遲吓利用呢啲技術，或者可以「打印」一碟肉醬意粉，「喺打印機加啲麵粉、加啲肉就可以打印啦」。