【明報專訊】特首梁振英(CY)不時喺禮賓府宴客，但唔係個個都應約，其中獲邀嘅港大學生會就請對方「食檸檬」，原因係覺得呢類飯局係閉門會面，有違公開透明原則；佢哋反客為主，邀請梁振英去港大出席論壇，但特首辦就話由於剛剛先收到邀請，所以未有決定，會考慮喎。

話唔透明 反邀去論壇

港大學生會噚日喺facebook發聲明交代事件，話上星期四會長梁麗幗收到特首辦職員電話，邀請佢哋4月22日去禮賓府食飯，但由於今次只係同港大學生會幹事會聚餐，特首辦無意公開畀其他港大同學或傳媒到場，所以覺得呢類閉門會面無助港大同學了解社會議題，或者對梁振英了解民情有大作用；反而會令人質疑學生會嘅透明度。

學生會更反客為主，佢哋覺得既然CY有心同學生見面，唔係收買人心，不如出席論壇交流仲好，所以向CY發出邀請，叫對方去港大，學生會將舉辦「問政論壇」，等同學可諮詢政策問題，認為呢個係最有效令同學同特首溝通嘅方法。