【明報專訊】前教育局長孫明揚前年退休後,噚日第一次出席公開講座,同理大學生開talk。政府財政開支問題鬧得熱哄哄,特首CY話應使則使,「梁粉」話財爺曾俊華唔肯使錢係「大罪人」。有在場人士問孫公,公務員同政治家有咩分別,孫公就話,公務員唔會淨係睇今日有啲咩,又話今日有錢唔代表聽日都會有,好似2003年財赤,政府要減開支,對政府嚟講係「痛苦」。但孫公講嘢一貫小心,肯定唔話自己支持CY定財爺,但佢講財赤,唔通想玩不言而喻?
小心講財赤:政府痛苦
今次講題係「量子與政治學:退休資深公務員的分享」,近年立法會議員興拉布,原來孫公早年對「拉布」有一手,佢話當年喺立法會提出廢除市政局及區域市政局法案,發現就快投票時,支持者唔喺位,咁就會唔夠票,立即拖長自己嘅發言,內容重重複複,搞到當時嘅主席頂佢唔順,叫佢要講得精簡啲。差唔多絕望之際,最終等到支持者返埋位湊夠票。
日日洗腎 玩孫買餸過日晨
近日特首普選問題好多爭議,孫公話自己好樂觀,相信香港嘅選舉安排問題有日會解決。Emily後來追問孫公有咩解決方法,佢笑笑口話:「個天會幫」。
孫公𠵱家每日都要洗腎,雖然去唔到旅行,但佢得閒就玩吓孫仔,仲會買餸過日晨。