【明報專訊】末代港督彭定康(圖)訪港行程緊密，不過佢都抽時間同舊部下、前政務司長陳方安生食飯。

陳太噚日喺商台《在晴朗的一天出發》上透露，前晚同肥彭去咗一間上海菜館食飯敘舊，大家都有講下香港近况。陳太話肥彭仍然對香港事務好有興趣，不過席上就冇討論政改。肥彭仲好關心𠵱家嘅公務員士氣，同埋舊同事嘅情况。至於肥彭出席活動時，有廿幾個手持港英旗嘅市民夾道歡迎佢，陳太就話肥彭都好開心有人歡迎佢，不過又有啲尷尬。陳太都有向佢解釋呢啲人唔喺搞港獨，「只喺懷緬港英時代，嗰時政府比較公平公正、社會比較公義啲」。

話肥彭關心公僕士氣

被問到同肥彭敘舊，會唔會怕被人話聯絡「外部勢力」，陳太即刻提高聲線話「當然無啦！」佢強調喺香港住咗咁多年，「香港畀咗我同家人好多好多」，所以有機會應回饋社會。陳太話，靠自己之前喺政府工作同做立法會議員嘅經驗，希望可以喺政府管治同政改方面「做到幾多都樂意去做」。