【明報專訊】醫管局前主席胡定旭接受馬會雜誌《駿步人生》創刊號訪問時爆料，前特首董建華當年游說佢加入醫管局，話每個月只需工作兩三日，工作量有限，於是答應咗，點知事實係付出嘅時間遠超兩三天，不過佢話從來無後悔，認為呢份工好有意義，所以一做就接近10年。

至於會唔會更上一層樓，佢就重申無意參選特首，只望「有才有德的人可走出來帶領香港」。咁邊個係佢眼中嘅才德之士？佢無明言，只係話不論沈祖堯、馬時亨或梁錦松參選特首，佢都樂意為佢哋撰寫競選宣言，甚至出任競選辦主任。

馬會新雜誌 盼注正能量

另外，有一篇專題報道就請嚟「眾人媽打」李麗娟，分享佢嘅退休生活點樣先至活得精彩。馬會呢本新雜誌，主要係希望透過報道社會上嘅好人好事，分享正面信息，為社會注入正能量、打打氣。呢份雜誌唔係馬會會員專利，市民可以免費睇，亦可以喺馬會網頁下載網上版(corporate.hkjc.com/corporate/operation)。