【明報專訊】廠商會今年年底換屆，將會出現男女同台競逐會長嘅場面，暫已浮面表示有意參選嘅有廠商會第二副會長李秀恒，及以玩具起家嘅另一副會長顏吳餘英。Emily噚日趁廠商會團拜，就問吓現任會長施榮懷有無心水，但施榮懷就點都唔肯講，只係話兩個參選人各有優點。 會長雌雄戰 黃友嘉：唔會性別歧視 廠商會一向陽剛味強，今次有女士計劃披甲出選，若當選，將會係廠商會80年來首個女會長。唔知前會長黃友嘉又想唔想見到廠商會有女會長呢？黃友嘉亦好小心咁話，廠商會一向都創先河，但佢哋唔會性別歧視，所以男女機會均等。 Emily噚日仲見到廠商會永遠名譽會長陳永棋，原來棋哥新年去咗歎世界，上郵輪兩星期，由澳洲去新西蘭環島一周。唔知佢又點睇民建聯蔣麗芸嘅「佔領郵輪」事件呢？棋哥同Emily講，搭船唔使大隻，最緊要靚同舒服，仲講咗句蔣麗芸坐個啲「唔係郵輪」，跟住就走咗喇！
|
| |
| |
;){kind=small}
