【明報專訊】中文大學新亞書院為咗向國學大師錢穆、唐君毅同張丕介等多位創院者致敬，設立咗「新亞校史館」，以文字、圖片、珍貴文物同多媒體裝置，展示過去65年來新亞嘅發展歷程。Emily噚日去睇過，館藏豐富，鎮館之寶有新亞校歌作詞人錢穆嘅親筆校歌手稿，亦有由校友捐贈嘅不同時期學生證、畢業證書等。
65年藏品 開放予公眾參觀
館內仲展出1940年代創院時深水埗桂林街校舍嘅枱櫈，呈現當年樸素嘅學習環境。
新亞校史館噚日舉行揭幕禮，由新亞書院校董會主席梁英偉、校友會會長黃浩潮、贊助校史館計劃嘅新亞書院校董林榮德等主禮。唔止中大學生有眼福，新亞校史館亦會開放畀公眾參觀，地點係中大新亞書院誠明館地下，開放時間係周一至周五早上9點半至下午4點半、周六早上9點半至中午12點，周日同公眾假期休館，查詢電話3943 7609。
除咗校史館，新亞書院亦創立咗網上校史資料庫同開展新亞刊物電子化計劃，讓新亞師生、校友同社會各界可以更方便認識新亞嘅起源、發展同教育目標。
