【明報專訊】今年元旦遊行人數由上年嘅13萬大跌至3萬(民陣數字)，唔少政黨嘅籌款數字都跟住大跌至少一半，不過遊行人數減少就無損「和平佔中」同「學民思潮」兩個民間組織嘅「吸金」能力，當中學民思潮籌得32.3萬，成為元旦遊行「吸金王」。

民陣真普聯籌19萬

學民思潮喺元旦遊行路線放咗6個街站，籌得逾32萬，和平佔中雖然得1個街站，亦籌得31萬。Emily聽聞，佔中發起人戴耀廷為其他團體着想，一早決定遊行全程只設1個街站，免得同其他團體競爭，但最後佔中「就住」都籌得31萬，吸金力毋庸置疑。至於民陣、真普聯，亦籌得19萬。

收兩空頭支票 社民連尋人

今年元旦遊行人數跌10萬，公民黨嘅籌款數字就足足跌咗11萬，由上年嘅18萬跌到7萬，工黨、民主黨、社民連都大跌一半。至於泛民「丐幫黨」社民連，今年出動副主席吳文遠，拋個身叫遊行者「攞錢掟佢」，成功將籌款數字推至13萬元，成為籌款最多嘅政黨，不過比起上年嘅25萬都係少咗近半。

近排咁多偽鈔事件，唔少團體元旦遊行都收到1000蚊金牛，但似乎大家都唔擔心「中獎」收偽鈔，淨係社民連有個小意外。吳文遠話，佢哋今年收到兩張兩萬蚊已簽名嘅「空頭支票」，可惜兩張支票暫時兌現唔到，呼籲捐錢嘅兩位有心人現身聯絡佢哋。