【明報專訊】立法會議員開會「秘史」明年有望解封公開，立法會喺出年元旦將會落實公開資料政策，着手處理封存資料檔案。秘書處又建議「最長封存期」，所有機密檔案，例如包括短樁事件、新機場事件及SARS事件等專責調查委員會等資料，最多封存50年後就會解封；一般非保密資料，例如內部通告就會喺20年後公開，建議將喺明年4月交立法會大會通過。

建議4月交立會通過

立法會秘書長陳維安話，希望推出公開資料後，可將現有工作正規化同加強議會透明度。雖然機密文件最長封存期有50年，但秘書處喺檔案建立25年內做解密覆檢，其後每4年再做一次。秘書處亦會按公眾索取申請覆檢檔案，如果大家對個別檔案有興趣，不妨向立法會提出開封要求。

公眾可提開封個別檔案

除咗專責委員會嘅秘密文件，Emily噚日參觀立法會圖書館時，仲發現一啲特別嘅封存文件，例如當年臨時立法會喺深圳開會嘅開支申報，唔知當時班議員北上開會有乜特別使費？

香港目前未有檔案法，立法會總檔案主任蔡長貞話，咁係會拖慢佢哋公開文件嘅進度，秘書處會按9項原則決定公開資料與否，例如公開該文件會否有違普通法禁止披露資料等。至於落實公開資料使唔使增加人手，蔡長貞就話，全香港只有3個註冊檔案保管員(archivist)，立法會就請咗兩個，第三個就喺政府檔案處做。