【明報專訊】宜家家居IKEA隻狼公仔「路姆西」(Lufsig)繼續大賣，噚日連貨尾都賣斷，粉絲要等到1月。理工大學設計學院助理教授黃國才(Kacey)，趁今日特首梁振英(CY)去觀塘「香港．深圳城市＼建築雙城雙年展」開幕，發起「路姆西飛行大賽」。Kacey話CY成日都強調做乜嘢都要合法，所以佢就諗到搞個比賽，等啲人可以合法地「讓路姆西飛」。

路姆西成證物 曾浚瑛買番

有份喺雙年展參展嘅Kacey話，警察好似大為緊張，噚日已喺會場架起過百鐵馬。不過，當初第一個掟路姆西嘅社民連成員曾浚瑛就話，以後應該唔會再掟，因為無新意，佢本身個隻路姆西已經畀警方沒收做證物，自己買多咗隻，但想自己留番。人民力量主席袁彌明就話唔知道有呢個比賽，人力有四五隻存貨，但因為太貴唔捨得掟。

BBC、《時代》、美國Huffington Post同瑞典媒體都有報道港人瘋搶路姆西，內地部分城市如深圳同廣州嘅IKEA嘅路姆西都畀人掃晒。

究竟Lufsig個名原本有咩意思？瑞典宜家發言人話畀Emily聽，宜家產品命名有一定規律，兒童用品如毛公仔，通常會以動物、雀鳥、昆蟲和「形容詞(descriptive words)」命名。Lufsig的原意解作「to lumber」，Emily查字典，除咗解伐木，仲可以解「慢而笨拙地移動」。佢又話，命名時會盡量避免用任何宜家銷售市場當地嘅粗口作為產品名字，但內地宜家點解譯咗做「路姆西」呢個似廣東話粗口嘅名，內地宜家就未有回應。

至於路姆西設計者Silke Leffler就多謝Emily關心路姆西公仔，但佢同宜家嘅合作已經完咗，唔回應問題喇。