【明報專訊】TVB不滿壹傳媒有關免費電視牌照事件嘅報道，上周落「封殺令」，將之列入不受歡迎傳媒，唔准佢哋入電視城，記者協會早前發聲明，批評TVB做法等同干預新聞自由，但有人唔滿意記協立場，仲聲言要「包圍記協」。

無綫：禁壹傳媒入城係保安措施

另外，無綫噚日又有新解法，外事部副總監曾醒明話，禁止壹傳媒入電視城嘅做法係保安措施，無干預新聞自由。記協噚日喺facebook話，近日收到幾名市民來電，話唔認同上周記協嘅聲明立場，認為有偏幫之嫌，仲有人聲言要包圍記協。除咗電話，不滿者亦用電郵攻勢，記協話收到幾個人共發出過百封內容重複嘅email，話記協以新聞自由為名炒作事件。記協話，佢哋聲明內容係以事論事，絕無偏袒，強調無論涉及邊間傳媒，佢哋都會表達關注，一視同仁，重申唔認同助長打壓新聞自由嘅歪風，令公眾知情權受剝削，而記協亦有操守小組，接受市民投訴傳媒操守問題。

記協：所有傳媒一視同仁

至於上周發動喺無綫台慶當晚圍堵電視城嘅網民，就呼籲網民刪除同無綫有關嘅手機程式，及杯葛無綫嘅特約廣告商。