【明報專訊】立法會早前公布立會嘉賓日午宴提供到會嘅餐廳名單，其中有一間「法國鵝肝專門店」。「大班」鄭經翰噚日撰文批評食鵝肝唔人道，不過，立法會秘書長陳維安(Kenneth)就話，原來呢間「法國鵝肝專門店」提供畀立法會嘅餐單並無鵝肝。

卿姐﹕不如多啲食齋

公民黨毛孟靜話，立會雖然今次唔係食鵝肝，但觀感唔係幾好，民主黨主席劉慧卿就建議不如立會多啲食齋！

今次茶杯裏嘅風波另一焦點，係提供午宴到會嘅餐廳名單包括賽馬會會所，「大班」質疑馬會畀立法會嘅報價每人458元，比會員搵馬會到會嘅價錢低好多，擔心立會日後監察馬會時會有利益衝突咁話。

不過，做過馬會高層嘅Kenneth噚日強調，立法會拎咗唔止一間私人會所嘅報價。佢又話，究竟要幾錢、係咪平咗，屬於馬會嘅定價政策，無辦法代馬會講。

馬會：不涉折扣優惠

Emily即刻搵馬會八下，馬會發言人話，向立法會嘉賓日午宴提供嘅報價資料，係因應客人需要，同考慮到佢哋能夠自行安排場地配套以及其他運作設施等而定嘅，不涉及任何折扣或優惠。馬會一向有向會員提供餐飲到會，大家聽到都可以放心食啦！