【明報專訊】前特首曾蔭權捲入以權謀私欲見教宗風波，但無損佢出席國慶酒會嘅雅興，噚日仲同前特首董建華同現任特首梁振英(CY)一齊上台向嘉賓祝酒。曾蔭權同CY中間只隔住終審法院首席法官馬道立一個身位距離，都叫做企喺台中間，不過唔知點解，一到祝酒環節，台上嘉賓紛紛向右搵中聯辦主任張曉明，搞到企喺左邊嘅曾蔭權「被邊緣化」，最後要自己行去埋堆搵人祝酒。

雖然係咁，不過「幫港出聲」周融見到曾蔭權就好熱情咁拉住佢，兩人密斟咗幾分鐘，但轉頭曾蔭權被記者叫佢交代想見教宗一事，佢就只係揮一揮手就走咗。周融話，佢同曾蔭權只係傾吓閒偈，同埋叫對方支持一下幫港出聲喎。