【Emily】經荃錦公路 51號線再出動雙層巴
[2025.08.22] 發表
【明報專訊】平日要去大帽山，唔少人會選擇喺荃灣搭51號九巴，經荃錦公路到達大帽山郊野公園。但唔知大家有冇發現，所有51號九巴都係單層巴士呢？為應付遊客增長，九巴噚日宣布星期日(24日)起將增派雙層巴行51號線，係時隔超過26年再有雙層巴士行呢條線。九巴話會密切留意需求，靈活調整班次。
翻查資料，九巴早喺1960年代營運經荃錦公路往來元朗同市區嘅線路。因應地區需求增加，九巴1990年代一度派雙層巴士行51號線，但隨住呢條線喺1998年改做全冷氣服務，九巴一直使用單層巴士行走至今。事實上，荃錦公路彎多路窄，現時就算係單層巴士都要經過特別改裝，如裝設手動減速器、加強馬力等，先足以應付有關路段。
因應近年遊客增加，九巴聯同多個政府部門早年着手籌備重派雙層巴士行走荃錦公路，經多次道路測試同各部門嘅路况改善工作，雙層巴終可再次穿梭荃錦公路。
更多港聞
【Emily】港鐵德福展 舊街坊顏汶羽帶父母搵回憶
【明報專訊】港鐵今日起喺德福廣場搞展覽，回顧呢項首個「鐵路加物業」嘅發展項目歷史。立法會議員顏汶羽噚日話佢嘅嫲嫲係德福花園首批業主，自己細細... 詳情相關新聞
