【Emily】美心推堂食軟餐 長者下月半價
[2025.07.23] 發表
【明報專訊】政府致力推動銀髮經濟，重點之一係推廣軟餐。美心集團噚日宣布，全線美心皇宮同15間指定美心快餐店將提供「軟心膳」堂食軟餐菜式，8月會推出優惠，持長者咭、樂悠咭或長者八達通可以半價惠顧指定菜式。
美心「軟心膳」聯同聖公會福利協會一齊研發菜式，按中西式造型製作，包括中式點心拼盤、香草雞槌飯、瑞士雞翼飯，賣54至68元。另外，荃灣美心皇宮獲社聯認證為「照護食種子餐廳」，另設5款軟餐菜式，包括琵琶豆腐、蟹籽蟹肉燴伊麵等。
美心集團首席營運官(香港及澳門)蕭德威話，幾百個長者試食「軟心膳」後都好滿意，預告短期內推出壽桃、盆菜等軟餐菜式，同時積極研發緊腸粉、山竹牛肉同奶皇包嘅點心軟餐。商經局長丘應樺感謝美心響應銀髮經濟政策，為長者提供安全優質嘅用餐選擇。
更多港聞
相關新聞
