【Emily】同港將比劍 鄭泳舜唔驚做「劍靶」
[2023.08.25] 發表
【明報專訊】「運動博覽2023」今日起至27日喺亞洲國際博覽館舉行，場內有好多產品及活動推介，聽日(26日)仲會舉行亞洲少年劍擊精英聯賽，匯集鄰近多個地區嘅少年劍神來港較勁，到時仲會有一場名人劍擊賽，由民建聯鄭泳舜拉埋邱達根、陳祖恒共3個立法會議員，加埋財政司副司長黃偉綸，同港隊劍手組隊比劍。
對於同港將比劍，議員會唔會成為「劍靶」，阿舜就話唔驚，仲話佢哋近期都有秘密練劍，而今次都係表演賽，娛樂為主。阿舜又話今次參與籌辦劍擊賽，有近2000個亞洲小劍手來港參加，連埋家長，來港嘅人唔少，有助帶動旅遊業。
「立會好聲音」 13議員伊館獻唱
另外，一批愛唱嘅議員就會喺9月8日做「歌星」，聯同藝人參與「立會好聲音」音樂會。演唱會將喺灣仔伊館舉行，睇宣傳海報，至少有13名議員獻唱，包括管浩鳴、容海恩、江玉歡、郭偉強等，睇嚟做議員除咗要安排時間開會投票，仲要多才多藝去表演。
更多港聞
【明報專訊】正當政界近期為振興夜市苦思對策，市場反應都好快，9月15及16日喺中環海濱將有一場手工啤酒節，有音樂表演同其他戶外遊戲，可以飲到...
詳情
【Emily】歐盟辦借場 居港烏克蘭人慶獨立日
【明報專訊】俄烏戰事爆發一年半，雖然烏克蘭未加入歐盟，歐盟駐港澳辦事處噚日就借場畀一班住喺香港嘅烏克蘭人，舉辦活動慶祝烏國獨立32周年，佢哋... 詳情
相關新聞
