【Emily】議員訪法院 廖長江容海恩坐法官位
[2023.06.03] 發表
【明報專訊】立法會司法及法律事務委員會噚日一年一度拜訪司法機構同參觀高等法院大樓，同終審法院首席法官張舉能、高院首席法官潘兆初、司法機構政務長梁悅賢會面同食飯。議員睇咗法院示範科技應用，包括遙距聆訊，而示範期間，委員會正副主席廖長江同容海恩就坐上平日嘅法官席，張官同潘官就坐記者席。
立法會秘書處話，議員同張官交流期間，關注到法院案件排期太耐、法官人手不足同科技應用。據Emily了解，其間講到國安法案件排期咁耐，司法機構解釋部分係因為疫情同2019年反修例案件，同埋國安法案件需要3個法官，部分案件被告比較多，影響到法官人手。
據聞早前訪問北京嘅張官都有分享，話內地法院科技應用好犀利，例如庭上陳辭之後就有中英文謄本。香港法院目前都測試緊謄本系統，另外陸續喺下級法院採用綜合法院案件管理系統。
更多港聞
相關新聞
