【Emily】邱達根申「灣區行」辯論加時 資深議員有疑慮
[2023.05.06] 發表
【明報專訊】政府同立法會上個月一齊去大灣區內地城市考察，大家都話收穫豐富，其中科技創新界立法會議員邱達根(Duncan)提出「團結行政與立法機關，全力推進大灣區建設」議員議案，排期5月17日喺大會討論，Duncan仲希望立法會主席可以延長辯論時間，畀所有希望發言嘅議員都可以發言。立法會內務委員會噚日討論Duncan嘅申請，議員普遍贊成延長辯論，但有資深議員關注，之後再有議員有同類申請會點處理。
林健鋒：日後都批？ 廖長江盼定條件
根據《議事規則》，議員議案嘅辯論以4小時為限。經民聯林健鋒先提出關注，問係咪以後有議員申請都會獲批；建制派「班長」廖長江就希望謹慎啲處理，希望立法會主席或內會制訂條件，喺咩情况下先可以延長辯論時間。
內會主席李慧琼就話，議事規則同時容許議員要求提出延長議案嘅辯論時間，若內會同意，會轉達畀立法會主席綜合考慮後決定。廖長江隨即補充話希望有透明度，畀大家知道主席點樣運用權力決定係咪批准申請。李慧琼亦補充，話之後會再研究係咪要就延長辯論時間申請訂立準則。
更多港聞
【Emily】APEC中小企工作小組會議 逾百代表到港
【明報專訊】亞太經合組織（APEC）經濟體超過100名代表同嘉賓近日雲集香港，出席一連兩日嘅APEC中小企業工作小組會議，係香港近期再次舉辦... 詳情
【明報專訊】通關後首個五一黃金周吸引大批內地旅客訪港，昂坪360噚日話，今年勞動節當日有超過8000個訪客，創疫情以來新高，較2018及20...
詳情
相關新聞
