【Emily】知柯創盛「唔唱K」 柯媽悉破電騙
[2022.12.02] 發表
【明報專訊】「猜猜我是誰」騙案日增，觀塘區議會主席民建聯柯創盛(柯仔)噚日出席秀茂坪警區「全民反詐騙宣傳日」，提到媽媽都差啲成為受害人。柯仔話媽媽之前收到來電，對方謊稱佢個仔唱K之後被捕，要求5萬元保釋金，但柯媽媽諗起自己個仔五音不全，都唔唱K嘅，一下就識破對方係騙徒，仲識打返畀柯仔核實添。
順利邨每日播防騙錄音
柯仔話，知道秀茂坪警區將會喺順利邨座頭播放防騙信息錄音，係全港率先咁做，希望同警方拍住上，提醒長者接到呢類來電要「停一停諗一諗」。呢批防騙信息由藝人薛家燕、曾志偉、炎明熹同林淑敏錄製，將會喺嚟緊一個月嘅朝早8至10點、12至2點同下午4至6點播放，效果好的話仲想推展至其他屋邨。
另外，觀塘一帶噚日有「防騙號」帆船巡遊，12月1號至3號亦會有宣傳巴士走訪各區，派發防騙宣傳物品，警方希望做到「防騙海陸空」，提升市民防騙意識。
更多港聞
【Emily】「撐你㗎」 自殺者親友製Sticker勉同路人
【明報專訊】面對摯親自殺，親友痛苦莫名。兩位曾經歷親友輕生嘅有心人，創作輕鬆嘅卡通畫作，製成10幅WhatsApp動態貼圖（Sticker）... 詳情
【明報專訊】今個月有兩場選舉，包括立法會補選以及港區人大代表選舉。噚日教聯會搞咗個見面會，安排一批教育界及創科界選委到場，同6名參加立法會補...
詳情
相關新聞
