【Emily】爆眼女移居加國 拍片稱生活已安頓
[2022.10.04] 發表
【明報專訊】2019年反修例運動期間喺尖沙嘴警署外被射傷眼球嘅女仔「K」，去年底已經移居加拿大。近日有自稱係「K」嘅人喺網上上載短片講自己生活狀况，仲叫大家以後可以叫番佢真名Karla，希望大家重新認識佢。短片主要喺影住Karla放狗，未見佢真人出鏡，旁白就話佢喺加拿大試過做唔同工作，最後決定做番本行，即係獸醫護士。佢話加拿大啲狗比香港嘅大隻好多，仲好大力，搞到佢搬唔郁。佢話生活大致已安頓好，一星期返工40個鐘，放假就煮飯、放狗，從生活平衡角度，佢話同香港簡直無得比。
提出拍片嘅其實係Karla男朋友，原因係想畀關心佢哋嘅人睇吓佢哋生活過成點，希望大家唔好咁擔心。Karla提到自己同男朋友英文都好差，拍片仲想畀自認英文差而唔敢移民嘅人睇，佢同男朋友點樣喺外國生存喎！
更多港聞
相關新聞
