【Emily】啟田邨長者屋將撤舍監 鄧家彪促保留
【明報專訊】申訴專員公署主動調查房屋署長者住屋,噚日截止收集意見,工聯會立法會議員鄧家彪同觀塘區議員簡銘東向申訴專員發公開信,讚長者屋有價值,「宜優化、勿取消」,又提到兩人跟進嘅藍田啟田邨啟旺樓長者住屋,目前住客跌至17人,房署通知將取消舍監服務,舍監維持至11月30日,兩人促請保留舍監。
當一型設計長者住屋只得20戶以下,房署就會取消舍監服務。房署回覆證實,啟旺樓長者屋剩番17戶長者,12月1日起取消舍監服務,會將單位內緊急警報警鐘連接至24小時保安控制室或大廈入口處保安櫃台,確保長者緊急服務唔受影響;長者可選擇調遷至有舍監嘅二型或三型設計長者屋。
兩人信中提到啟旺樓長者屋大部分長者都80至90幾歲,經過舍監持續辦活動後凝聚力好強,舍監幫手買餸、煮餸、餵藥;批評取消舍監如奪走長者「家人」同照顧者,違反當年入住協議同承諾;又認為有舍監嘅長者屋如低度照顧嘅長者院舍,成本更輕,質疑點解唔保留。