【Emily】屋企一個月捉7隻 梁毓偉教捕鼠竅門
[2022.08.24] 發表
【明報專訊】Emily早前報道過，立法會選委會界別議員梁毓偉家中飽受鼠患困擾，因為屋企附近有地盤，搞到佢屋企一個月內捉到六七隻老鼠。佢話收到唔少市民同朋友求助，想知道點樣捉老鼠，噚日佢就喺facebook拍片教喺屋企捉老鼠嘅小技巧，包括檢查「窿窿罅罅」確保老鼠入唔到屋，亦可將薄荷葉粉或者辣椒粉放喺屋企驅鼠。
梁毓偉形容捉老鼠要「鬥智鬥力」，提醒大家要先確保老鼠無途徑入屋，例如冷氣機口或者喉管，舉例話自己屋企懷疑係冷氣機附近嘅喉管位封唔實。至於捉老鼠，佢就話主要靠老鼠板黏住老鼠，試過一晚捉到兩隻。佢提醒老鼠主要沿牆邊跑，所以要將老鼠板放喺牆角或牆邊，亦可透過排泄物留意老鼠嘅走動位置。佢仲話老鼠板要不時換位，唔好畀老鼠習慣。
更多港聞
相關新聞
