【Emily】警公關部出帖講架構 4組率先登場

警隊噚日喺facebook介紹公共關係部轄下其中4個組別嘅工作範疇，涵蓋社區聯絡、傳媒聯絡、影視聯絡等。（警隊facebook圖片）

【明報專訊】警務處公共關係科(PPRB)升格為「公共關係部」(Public Relations Wing, PRW)，警隊噚日喺facebook拆解其架構，並介紹轄下其中4個組別嘅工作範疇，涵蓋社區聯絡、傳媒聯絡等。當中嘅「影視聯絡組」除咗負責每星期嘅《警聲直播》節目，亦會處理同警察有關嘅電視、電影拍攝申請，以及同其他媒體合作拍攝。

而「項目及發展組」就專責社區聯絡，亦會負責八鄉少年警訊中心嘅未來發展。「少年警訊組」就負責推動同培育青少年成為青年領袖滅罪伙伴，提升青少年嘅守法意識同社會責任感。至於較為人熟悉嘅「警察傳媒聯絡隊」亦由公共關係部管轄，聯絡隊會分擔前線警務人員嘅傳媒聯絡工作，以免影響佢哋行動，亦會喺前線協助傳媒工作、同傳媒溝通，處理同媒體有關嘅事件。

另外，輔助警察隊上周六舉行開放日，當日有輔警招募遴選簡介會同體能工作坊，亦有輔警樂隊及中式步操隊表演等活動。開放日有逾500人出席，並即場收到逾100份投考輔警申請。