【Emily】初選案楊雪盈教陶瓷 「好好活下去」
[2022.08.20] 發表
【明報專訊】民主派初選案29個被告表明會認罪，18人就唔認罪，其中暫時準備唔認罪嘅灣仔區議會前主席楊雪盈(Clarisse)，前晚就喺facebook感謝外界嘅關心同問候，又透露𠵱家有開班教陶瓷，而案件下次上庭係11月，感慨「彷彿為現在深深的投入劃上了限期」。
11月上庭 感投入「劃咗限期」
初選案部分被告由去年3月還押到𠵱家，獲准保釋嘅Clarisse話，好多時候去探還押緊嘅被告，反而會被安慰番轉頭，所以感覺喺外面嘅人更加要「好好活下去」，喺能力範圍內幫助有需要嘅人。佢話𠵱家主要時間投放係做陶瓷，亦有開班，認為見到學生嘅成果，就覺得做咗好有意思嘅事。佢亦趁機宣傳，話有興趣嘅話，可以成為佢嘅陶瓷學生。
吳政亨：我恐懼，但我不退
另一傾向唔認罪、正還押緊嘅被告吳政亨就透過facebook解釋決定。佢話雖然有好多現實考量，例如辯護空間、認罪可以減刑等，但佢選擇還原基本步，自問自己無犯罪，所以唔認罪，又喺帖文中提到「我恐懼，但我不退」。
至於表明認罪、獲准保釋嘅前學民思潮發言人黃子悅就喺facebook講感想，「人無法控制時間，也總會面臨各種厄運，卻是在那有限和毁滅中，肯定自己為何而活」。
更多港聞
【Emily】葉劉去社協攝影展 基層妹妹送自製花
【明報專訊】行政會議召集人葉劉淑儀（左）噚日出席社區組織協會（SOCO）舉辦嘅「基層疫下攝影展覽」開幕禮，獲一個小妹妹送上自製嘅花束。小妹妹... 詳情
【明報專訊】廉政專員胡英明履新個多月，噚日發表首篇網誌。佢自言對於「滿月」嘅個人表現分數及格，不過仲有好多改善空間。團隊又拍片記錄胡英明早前...
詳情
相關新聞
