【Emily】家有鼠患 梁毓偉一個月捉到7隻
[2022.08.18] 發表
【明報專訊】政府最近展開全港清潔運動，銳意改善社區衛生問題，選委會界別立法會議員梁毓偉(Kenneth)對此亦相當關注。佢同Emily講，屋企近日受到鼠患困擾，佢仲化身「滅鼠專家」，短短一個月喺屋企捉咗6、7隻老鼠，有啲大過手掌。
Kenneth住6樓仍受鼠患影響，佢認為問題幾誇張，即使買咗老鼠板滅鼠都唔一定成功。佢又話囝囝年紀尚小，唔算好驚老鼠，甚至以為係「米奇老鼠」，但囝囝有時會誤踩老鼠板。
另外，Kenneth透露將於柴灣青年廣場開設議員辦事處，原定上星期開幕，不過家中長輩提醒適逢農曆七月唔適合搞開幕禮，佢認為唔差在幾個禮拜，就決定延期開張。一向關注青年事務嘅Kenneth話，唔少NGO(非政府組織)進駐青年廣場，希望議辦可以為佢哋提供協助，亦歡迎有需要嘅年輕人到佢嘅議辦。
更多港聞
相關新聞
