【Emily】鄉局研究中心「完成歷史任務」 劉業強話無關姑丈薛浩然「酬庸論」
[2022.08.13] 發表
【明報專訊】新界鄉議局星期三(10日)向成員發信，話經主席劉業強同副主席林偉強、莫錦貴商議後，決定撤銷「新界鄉議局研究中心」。2014年成立嘅研究中心，主任係劉業強嘅姑丈薛浩然(小圖)，佢近日拍片批評今年授勳、行政會議名單係政治酬庸，有說法認為研究中心被廢，係鄉議局要同薛「割席」。劉業強噚日同Emily講，原因係研究中心「完成歷史任務」，呢個時間處理只係「剛剛遇着啱啱」。
劉曾話姑丈言論唔代表鄉局
薛浩然評論授勳同行會成員名單後，劉業強曾發聲明，話薛嘅言論唔代表鄉議局。至於係咪因為呢件事而取消研究中心，劉業強話研究中心係父親劉皇發主理鄉議局時成立，當時見到唔少成員好新可能唔知道政策同歷史，而薛浩然就最有經驗；研究中心嘅出版都好有用，好多人參考新界條例、丁權等，但呢啲方面都寫得「七七八八」，新界最新發展係北部都會區，將來可能外判畀人研究。
薛浩然前日喺facebook交代「心中的話」，重申當年跟隨劉皇發參與鄉議局維護原居民合法傳統權益，至今40年，過去現在未來發表任何言論，除非獲鄉議局正式授權，否則全屬個人見解，與鄉議局同劉皇發家族無關，「若因此為他們今天帶來巨大的政治壓力，本人深感遺憾」。至於鄉議局有冇向佢交代取消研究中心嘅原因，薛浩然話暫時冇回應。
更多港聞
【Emily】白海豚出沒回升 最新40 多咗3條
【明報專訊】漁護署公布最新中華白海豚監察報告，發現舊年4月至今年3月，喺本港水域出沒嘅中華白海豚有40條，比舊年37條略升3條，係近年第三低... 詳情
【明報專訊】曾經幫前特首梁振英助選嘅前新聞主播洪綺敏（Cathy）原先幫新城電台主持節目，日前佢喺個人facebook話喺新城last da...
詳情
【Emily】新民黨施俊輝做教局副局 葉劉：冇推薦 唔記得佢係黨員
【明報專訊】政府上個月委任新一批副局長同政治助理，其中4人有新民黨背景，包括教育局副局長施俊輝（圖）、勞福局長政治助理傅曉琳、創新科技及工業... 詳情相關新聞
