【Emily】網友staycation求婚 酒店「壞人之美」

網民喺facebook分享預約酒店房求婚嘅不快經歷，事主佈置好房間，帶女友前往打算求婚時，一門開見到佈置唔見晒，仲有職員執緊房。圖為事主原本佈置。（「香港Staycation酒店交流谷」群組圖片）

【明報專訊】𠵱家facebook有好多唔同類型關注組，畀大家分享經驗、感受，Emily噚日喺網上見到網民廣傳「香港 Staycation酒店交流谷」一個帖文，發文嘅網民預約咗中環「木的地酒店」staycation，喺未婚妻生日當日求婚，但該網民形容，嗰日成為佢人生最黑暗最難忘嘅一日。

早一日到房佈置 第二日唔見晒

根據該網民所講，佢喺求婚前一日到酒店房佈置，仲同酒店職員夾定，翌日同女友入住時會「扮check in」，點知求婚當日同女友上到酒店房，打開門見到執房職員，原本嘅佈置、求婚用嘅花束唔見晒，一問之下，執房同接待嘅職員都「唔清楚」、「唔知點解」，最後搞到女友都喊晒，結果兩個人去咗另一間酒店再慶祝。

酒店道歉賠償 話會加強培訓

網民話酒店都有道歉同賠償，Emily問番酒店，酒店回覆話對今次單一事件深感抱歉，已內部調查同跟進，退回預訂房間、佈置同花束費用，以及額外4晚嘅住宿開支。酒店噚日亦再主動聯絡客人致歉，並應客人額外提出嘅要求全部跟進，酒店管理層亦已向有關部門同員工加強培訓，避免同類事件再發生。