【Emily】救貓狗兼安撫獲讚 消防處：生命無分輕重
[2022.05.23] 發表
【明報專訊】鴨脷洲海怡廣場一間寵物cafe早前火燭，消防員入火場營救一狗三貓，片段傳出後喺網上廣傳，好多人見到消防員拍拍貓仔、狗仔個頭安撫佢哋一幕，讚消防員愛心爆棚。消防處噚日喺facebook回應事件，話「生命無分輕重」，無論係人定動物，佢哋都一視同仁，履行救災扶危嘅使命。
事件中好彩無人同動物受傷。寵物店負責人事後仲帶埋被救出火場、等待領養嘅狗女Betty，去鴨脷洲消防局「探班」及多謝消防員。寵物cafe事件見報後，其中兩隻貓獲有心人領養，消防處話，衷心祝福所有「毛孩」都可以搵到愛錫佢哋嘅主人，有一個幸福快樂嘅家。
另一條流傳影片，係消防員拯救匿埋喺雨水渠入面嘅一家三口流浪貓，最後救出兩隻幼貓，但大貓就跑走咗。
唔少網民喺消防處個post下面留言大讚，話消防處係超級優秀嘅紀律部門；有網民講自身經驗，話試過搵消防員幫手救貓，「佢哋真係好似救人一樣咁盡力，珍惜每一條生命」。
更多港聞
【Emily】兩度無緣畢業禮 羅冠聰獲頒榮譽博士補憾
【明報專訊】前香港眾志主席、立法會前議員羅冠聰（Nathan）流亡海外兩年，佢喺美國耶魯大學讀完碩士，近日獲美國東岸賓夕法尼亞州私立博雅大學... 詳情
【Emily】葉劉推介腸粉又被笑 黎棟國「護花」
【明報專訊】上周後期天氣幾好，新民黨主席葉劉淑儀上周六喺facebook出帖，話趁住天朗氣清去西貢遊覽，仲發現到一間小店「不得了」嘅豉油王煎... 詳情
【Emily】伙EQ探劏房戶 鄧炳強講完對冲講公屋
【明報專訊】民建聯葛珮帆（EQ）、香港廣州社團總會同沙田婦女會等噚日合辦「食物援助送暖行動」，邀請保安局長鄧炳強一齊包裝1500份食物福袋，... 詳情
相關新聞
