【Emily】東鐵過海頭班車 明5：25會展站開出 城巴過海301號線榮休 巴迷送別

[2022.05.14] 發表

【明報專訊】鐵路迷期待已久嘅東鐵線過海段，聽日正式通車，港鐵噚日公布，頭班車會喺聽日清晨5點25分由會展站開出，港鐵會喺凌晨4點45分左右率先開放會展站A3出口，方便前來「追鐵」搶搭頭班車嘅鐵路迷。

鐵路迷有新鐵路搭固然興奮，但一眾巴士迷就感到依依不捨，皆因由城巴新巴營運、來往紅磡至上環嘅過海隧道巴士301，隨着過海段開通，噚日正式「榮休」，最後一班車噚日朝早9點15分由紅磡海底隧道車站開出，喺大批巴士迷見證下，結束逾30年歷史任務。

301號線1991年開辦，為疏導周一至五早上繁忙時段嘅過海人潮而設，城巴新巴噚日除咗向最後一程嘅乘客派證書同貼紙留念，仲特別安排當年駕駛首班301嘅車長劉永洪，噚日為乘客駕駛最後一班車。

劉車長話，以前巴士仲係3座位嗰時，301已經好犀利，一班車最少150至160人，多年來接載唔少市民過海，佢日後會好懷念301。

更多港聞

【明報專訊】本港第五波新冠疫情一幕幕生命逝去嘅悲劇，令人心酸。新思維早前訪問院舍員工、管理層同埋院友家屬，講述疫下經歷，新思維主席、社福界議... 詳情

【明報專訊】今年係香港大學醫學院成立135周年，由前日起至下星期五，醫學院會喺官方網站拍賣限量版紀念椅，收益全數撥歸醫學院嘅學生獎學金同經濟... 詳情