【Emily】雙層電動巴士最快暑假載客

[2022.04.30] 發表

【明報專訊】巴士迷留意，繼九巴16架單層電動巴士周一投入服務後，新巴城巴營運嘅全港首架雙層電動巴士噚日亦正式啟動，下個月會走訪各區同大家見面，停低開放畀市民上車參觀，最快暑假正式載客，首階段試行來往堅尼地城同香港大球場嘅5B線，同埋來往啟德郵輪碼頭同土瓜灣嘅22M線。

呢架雙層電巴去年底來港驗車時，巴士車身以黃藍色為主，當時有網民話覺得似烏克蘭國旗，𠵱家最新設計就以藍色為主，象徵零碳排放。全車可載113名乘客，比柴油車少約10人，續航力超過200公里，充2.5至3小時電夠行全日，巴士上有WiFi，座位有USB充電位，車費暫定同柴油巴一樣。

新巴城巴母公司匯達交通話，7月會引入全港首架氫能雙層巴士，屆時會同電動巴一齊測試，視乎表現決定將來引入比例，目標2045年全面使用零排放巴士。

更多港聞

【明報專訊】司法機構噚日宣布委任資深大律師黃佩琪同陳政龍，做高等法院原訟庭特委法官，任期2022年5月1日生效，為期3年。現年49歲... 詳情