張宇人多謝林鄭長期支持飲食界
[2022.04.21] 發表
【明報專訊】食肆今日(21日)開始恢復晚市堂食至晚上10點，自由黨飲食界議員張宇人噚日拍片，提醒業界遵守規定，包括檢查顧客嘅疫苗通行證，以及員工須每3日做快測。佢又喺facebook表示，感謝特首林鄭月娥由擔任發展局長時期已十分支持飲食界，喺各輪防疫抗疫基金同「保就業」計劃亦對業界照顧有加。
張宇人話，飲食界捱咗3個多月，終於恢復晚市，但相信執法當局會加緊檢查疫苗通行證，所以提醒食肆定要檢查顧客嘅針卡，而食肆目前亦未能恢復麻將耍樂。
林太亦喺fb出帖，話張宇人時常自稱「酒樓佬」、「廚房佬」，而自己多年來同飲食業界交往都好欣賞佢哋嘅拼搏精神、率直性格，兩年多抗疫過程中，飲食業受到好大打擊，希望隨住恢復晚市堂食，業界可以否極泰來。佢提醒員工和顧客緊守衛生防護措施，遵從「安心出行」和疫苗通行證要求，如非飲食，仍須戴口罩。
更多港聞
相關新聞
