【Emily】民主黨開網店籌款 賣卿姐金句明信片
[2022.04.12] 發表
【明報專訊】民主黨過去兩年因新冠疫情未能籌款，加上區議員辭職或被取消資格，因而陷入財困，噚日宣布決定開網店籌款。除咗布袋、扣針、信紙外，仲推出印有民主黨前主席金句嘅明信片，頭炮就用咗劉慧卿唔同時期嘅相片同金句，由立法局年代到從立法會退落嚟之前都有，例如有一款就印咗卿姐2010年做立法會財委會主席、主持高鐵撥款審議後嘅總結，話有唔同意見完全無問題，但喺討論過程中，要聽別人意見，咁先係最重要。
民主黨籌款委員會主席袁海文話，徵得卿姐同意後先整明信片。黨主席羅健熙就笑言未出動卿姐經典小背心嘅相，相信卿姐唔會介意嘅。袁海文話，不時都收到市民為民主黨打氣，所以希望用前主席金句鼓勵番大家。
Emily問過卿姐，佢笑言自己無參與揀相，但當然唔介意黨友用嚟整明信片，最緊要可以幫到黨籌款。至於無用到經典小背心相，卿姐自嘲話唔攞仲好，「攞出嚟都唔知籌唔籌到(錢)」。至於購買等詳情，民主黨稍後公布。
更多港聞
【明報專訊】《星笈中文》文憑試講座邀請了仁濟醫院王華湘中學雷國威老師、新會商會陳白沙紀念中學梁璇筠老師及滙基書院（東九龍）余震宇老師，分別分...
詳情
相關新聞
