【Emily】久未出po 游蕙禎籲一齊留喺度
[2022.03.26] 發表
【明報專訊】前青年新政成員游蕙禎自上年5月之後，就無喺facebook同Instagram專頁發布信息，前晚突然上載一張同熱水爐嘅自拍相，預告噚日出片，相中嘅佢臉尖尖，唔少網民讚靚咗。游蕙禎噚日上載一段約5分鐘片段，好多都係呢兩年疫下市况，包括市民排長龍做檢測、店舖十室九空。
佢喺影片讀咗一段好長嘅讀白，形容「社交距離成為人與人之間心靈上巨大的隔閡」，又話近幾年網上瘋傳無數打交爭執批鬥片段，刻畫住呢個城市嘅衰亡，冇人願見自己嘅城市變成咁。佢亦講到離開對好多人嚟講可能為咗療傷，但「捨棄這裏的一切，任由這個地方的傷口愈變愈大，是否真的一個能令呢度好番嘅方法？」
讀白最後提到，「用我們百年以來嘅知識同智慧，冇病係我哋醫唔好嘅」，形容「我哋就係呢個地方嘅主診醫生」，又話「同我一齊留喺度，醫番好呢個地方，好唔好？」
努力還緊立法會薪津
被問到係咪復出同參政，游蕙禎話𠵱家無特定計劃，只係見到社會氣氛麻麻，留喺香港好似孤立無援，想為朋友打打氣。佢話現時有做生意，努力還緊立法會薪津，仲有兩年多啲。游蕙禎2016年因宣誓風波被褫奪立法會議員資格，被追討議員薪津。
更多港聞
【Emily】在港日本人送飲品 為瑪麗醫護打氣
【明報專訊】疫情之下，醫護一直喺最前線照顧病人，在港日本人團體「香港日本料理店協會」同「香港日本食品及料理業協會」話，在港日本人社群成日用到... 詳情相關新聞
