【Emily】人代上京開會 先深圳隔離一周
[2022.02.19] 發表
【明報專訊】本港第五波新冠疫情嚴峻，3月初要上北京出席全國兩會嘅港區人大代表同政協委員都收到新安排，上京前要先到深圳隔離一星期。全國人大常委譚耀宗喺港台節目《千禧年代》講，今個月27號將召開全國人大常委會會議，3月5日全國人大會議開幕，出席嘅人代、政協要提前7日到深圳隔離，其間接受核酸檢測，獲陰性結果後再坐包機去北京，抵達北京後要閉環管理，每次開會都由專車接載去會場。
譚耀宗話，以前上京開會都唔使隔離，喺香港病毒檢測呈陰性，去到北京做多次檢測，結果呈陰性就可以開會。數數吓，今次隔離連同開會，最少要大半個月，但譚耀宗相信一年一次嘅兩會要傾全國事務，除非喺香港做緊抗疫工作要告假，否則各人代、政協都會一齊出席會議。
有政協就話佢哋收到通知，要提早喺下周四北上隔離。有人代就話要隔離一周好慘，但好難搵藉口唔出席。
更多港聞
相關新聞
