【Emily】張欣宇被指聘「港獨分子」 楊振謙:曾經迷失
【明報專訊】網媒「思考HK」近日刊登文章,全國港澳研究會會員陳凱文點名質疑新界北立法會議員張欣宇請「港獨分子任議助」,所指嘅係曾多次投稿《熱血時報》嘅楊振謙,指楊嘅文章可見其鮮明「反共」立場,並指同名同姓嘅人於2019年喺facebook貼「光時」字句。
張:要引導佢哋回正軌
張欣宇同楊振謙噚日先後喺facebook回應,張欣宇話,楊讀書時曾喺港鐵兼職車站助理,兩人因此認識,指楊確實曾經偏激過,但認為面對唔少年輕人思想出現偏差,要改變就應該身體力行地接觸、影響佢哋,引導佢哋重回正軌。
張欣宇話楊嘅「往跡(績)」再被拎出嚟,本來都係佢要經歷同面對嘅人生一課,但反問,作為社會嘅中堅力量,尤其係管治體系一員,「是徹底放棄他們,還是努力去幫助他們,幫助他們回到去一條建設城市的正軌?」張欣宇表示會選擇後者。佢同Emily講,諗咗一輪決定回應比較好,仲話楊振謙投稿時只得15、16歲,唔認同因為一個人過去有「污點」,就要放棄佢。
同名同姓者年前fb貼「光時」
返工3星期嘅楊振謙回應時先道歉,自言曾經迷失,發表過錯誤言論,但明白每個人要為自己行為付出代價。楊稱幫張助選期間,開始理解敵意同偏激唔能夠令社會更進一步,經歷近年動盪,佢明白香港係中國一個地方行政區,而作為年輕人,佢無疑對香港好多現狀失望,但話張欣宇所屬嘅「新方向」鼓舞咗佢,認為未來可唔可以變好就取決於自己。