【Emily】港鐵站社區畫廊消失 與需否領牌有關
[2022.01.15] 發表
【明報專訊】大家平日出入港鐵站，應該留意到通道兩邊，不時貼咗啲學生或非牟利團體藝術家嘅畫作，不過近排全部唔見晒。港鐵前員工、新任立法會議員張欣宇最近收到唔同地區嘅學校校長同社福機構查詢，想佢跟進港鐵嘅社區畫廊點解突然無咗。張欣宇問番港鐵，先知道同牌照有關，原來社區畫廊算係展覽，理應向食環署申請相關牌照，但港鐵一直未有申請。港鐵表示，正檢視畫廊是否涉及領取臨時公眾娛樂牌照，故暫停展示。
翻查資料，最早嘅社區畫廊喺2000年2月，於藍田站嘅兩條行人天橋設立，到近期有63個港鐵站設有社區畫廊。
張欣宇話，可能大家知道佢做過港鐵，就搵佢幫手，以佢記憶所及，港鐵一直未處理過相關牌照申請。佢話前晚已經去信運房局，希望當局快啲處理申請，又話臨近農曆新年，相信學生同非牟利機構藝術家已經準備好作品，如果作品無法展出，一定好失望咁話。
更多港聞
【Emily】六四集會案判囚9月 梁錦威失葵青區會議席
【明報專訊】政府噚日刊憲宣布葵青區議員梁錦威（圖）嘅議席出缺，議席由去年11月12日起懸空，由於佢兼任區議會主席，料主席一職需要重選。梁錦威... 詳情
【明報專訊】新一屆立法會議員上任冇耐，選委會界別江玉歡（Doreen）同民建聯劉國勳就已經「隔空過招」，辯論北部都會區。話說Doreen噚日...
詳情
相關新聞
