【Emily】跨年演唱抽飛名單出爐
[2021.12.04] 發表
【明報專訊】旅發局除夕會喺西九文化區舉行「香港跨年倒數演唱會」，演出嘅包括人氣組合MIRROR等，吸引20萬人參加門票抽獎。旅發局噚日喺網頁公布得獎名單，有1500人各得兩張飛，得獎者會喺噚日至聽日收到短訊通知，並且要喺12月13日夜晚9點前，帶同得獎短訊、身分證、新冠疫苗打針紀錄，親身到九龍圓方商場水區2樓領獎。
旅發局講明座位喺抽獎時已由電腦系統隨機編配，不設揀位，得獎者及同行者唔使急住拎門票，而門票係用實名制，無得授權代領，亦唔可以同其他得獎者交換。得獎者及同行者仲要分別簽同意書，同意主辦單位向政府核實佢哋嘅疫苗接種紀錄。
更多港聞
相關新聞
